Soekvorm

Aposol 14

Paulu Ye Banabas Tiraia Bingi Dook Mata Pang Di Tooltool Ke Aikoniam

1Paulu iye Banabas tina ngan tila tiyepe Aikoniam nga, ngan yaru tiyei urata gaongo leu ben yo tiyepe Antiok inbe tiyei nga. Le nga yaru tipa a tilo ye rumu kidi Yuda ke gaongo in lono lo tiwete betanga ke Maro pang di tooltool. Ngan yaru tiwete le koodi mede ye betanga tani yo dook mata i, le di tooltool kidi Yuda tiye di tooltool yo tipa ye rara kidi Yuda tiap nga, ngan alunu la titara lodi medana pang Yesu nga. 2Bong ngan di tooltool kapala kidi Yuda yo titara lodi medana pang Yesu tiap nga, ngan tikan di tooltool yo tipa ye rara kidi Yuda tiap nga, ngan lodi, a nen ngan be lodi dook tiap pang di tooltool kapala yo titara lodi medana pang Yesu nga. 3Bong ngan Paulu iye Banabas tina ngan tiyepe kaiye nango la Aikoniam ngo. Ngan yaru titattadai tiap, bong tiwete pobe pang di tooltool ye betanga ke Tool Mai yo be iyei dada dook mata pang di tooltool nga. Ngan nen le Tool Mai ikap gurana pang di yaru be tiyei urata maimai, inbe mos matana matana a iyei ben tarkilanga pang di, a be nen ngan di tooltool tina ngan tikamata ben betanga ke Tool Mai yo yaru tiwete nga, ngan moolmool le imot. 4Bong ngan di tooltool ke malala mai tani in tiparpoto le tiyepe ye budanga ru. Le di kapala ngan tikata suanga ye di Yuda, inbe kapala ngan la tikata suanga ye di aposol ke Yesu. 5Motong la di Yuda tina ngan tiye di tooltool yo tipa ye rara kidi Yuda tiap nga, inbe di kuto maimai kidi nga, ngan tiraua betanga be ole tiraua Paulu iye Banabas tina, inbe tikap pat a tikatmatamata di ye le timmata. 6Bong ngan Paulu iye Banabas talngadi rau ye dada dook tiap tina yo be di tooltool tina ngan tiyei pang di nga, motong la yaru tikoo le tila ye malala mai ru yo edi Listara ye Debe, yo iken ye tana mai Likonia nga, inbe ye malala kapala yo iken potai pang ye malala mai ru tina nga. 7Ngan la tiyepe nango, inbe yaru tiwetewete bingi dook mata pang di tooltool ke malala tina ngo.

Paulu Iye Banabas Tiyepe Listara Le Debe

8Ye kene yo Paulu iye Banabas tiyepe Listara ye in nga, ngan tool atu yo tinana ipasuiu ngan kene ikap rama nen le ipa tiap bong ipas le iwur leu i, in iyepe lapau. 9Le nga tool tani in itar talngana pang Paulu yo iwetewete pang di tooltool ye betanga ke Maro nga. Motong la Paulu matan ikenen ye tool tani, ngan ikamata ben ya in itara lono medana be ikarata ngan ole tinini dook mata mulu. 10Motong la Paulu koonoo panga, inbe iyei ne, “Ai, kumadit le lo kukodo!” Ngan le tool tani in imadit purukbe le lo ikodo, inbe ipa.

11Ye kene tani in di tooltool malala mai tina yo man tigaua a tilongo betanga nga, ngan tikamata so tani yo Paulu iyeii i, le nga koodi le mai ye di Likonia koodi nen, “Ona tiap! Di maro tiportak le tiyei ben di tooltool nga, inbe tisi pombe pang yidi sa!” 12Motong la di tooltool tina ngan tisu Banabas ye maro kidi yo ene Sus i. Inbe Paulu in tooltool ke betebetanga le tisua ye maro kidi san yo ene Emes i.+ 13Ngan maro tani yo Sus i, in bareme ki ke sungunu in ikodo ke diki ke koongoo ke malala mai tani in. Le nga tool ke paroranga so pang Sus in ikap di asara yo edi bulumakau ngan tamoto pattu inbe ool yo tituru ye ooroo nga, motong la iye di tooltool yo tipare so be man tiparoro pang Paulu iye Banabas nga, ngan tikap so tina ngan a timan pang ye dada ke malala mai tani nga.

14Bong ngan ye kene tani in Yesu di aposol ki ru tina yo Banabas iye Paulu, ngan tilongo betanga ye so tina yo be man tiyei pang di nga. Le nga yaru lodi dook tiap le timadit tina le tisarrak sousoungu kidi, inbe yaru tidada le tidu kataunu kidi tooltool malala mai tina, inbe koodi le mai nen, 15“Ai, di tooltool kiam nga, nga yelei a be kayei dada nen pam nga? Amru nga tooltool dawa ben ang ngan lapau. Ngan amru nga amman be man amwetewete pang ye bingi dook mata, a be nen ngan kaportak lomim a kayege maro kiang yo moolmool tiap nga, inbe kasung pang Maro yo iyepe nen le taukan matenge i. Ya in la itar lang le tana le tiek, inbe so tina le imot yo iken ye di nga. 16Moolmool, muku ngan imalum pang di tooltool yo rara san ngan be di tapdi titoo lodi ye so yo tiyei nga. 17Bong Maro tani in ya taunu itarkoo so sa ye di tooltool a nen ngan lodi sarere ye, ngan tiap. Bong kanakana ngan ipaposi ye dada dook mata yo iyei pang nga. Le iyeie ki a imol ke lang katene a isi pang yang, inbe iyei so kiang yo kape nga le itar kanono dook mata, inbe ikap kaningi alunu kaiye pang a be nen ngan iye ang le lomim ponana kaiye.” 18Ngan Paulu iye Banabas tina tiwete nen, bong yaru tikapye be tilele di tooltool tina a be nen ngan tiyei paroranga ye so tina ngan pang di be.

19Motong la di Yuda kapala yo tipa ke Antiok le Aikoniam a timan pang malala mai Listara nga, ngan tikan di tooltool tina ngan lodi, le tikap malmal pang Paulu. Motong la tikap pat a tikata Paulu ye le matan taltalai, le nga tiyeisa o imata koot, motong la tiyololo bobono du ke diki ke malala mai tani in nga. 20Ngan Paulu idu ke diki, motong la Yesu di galiunu yo kapala nga, ngan titoo a tidu du tikodo le tigaliuu, ngan imadit mulu, motong la tiye timulu a tilo pang malala mai tani in lono nga. Le nga tiken le bongbongini ki, motong la Paulu tani in iye Banabas timadit a tila pang malala mai Debe nga.

Paulu Iye Banabas Timulu Pang Antiok Ke Tana Mai Siria

21Paulu iye Banabas tila tiyepe kasin ye malala mai Debe, inbe tiwetewete pang di tooltool ye betanga ke Maro nga, ngan le di tooltool alunu le alunu kaiye la titara lodi medana pang Yesu a tiyei galiunu nga. Motong la yaru timulu a tila pang Listara, le Aikoniam, inbe Antiok nga, 22a be nen ngan la yaru tipamede di tooltool tina yo tiyei ben Yesu di galiunu koot nga, inbe tikap betanga pang di be tikodo le timede ye lodi medana yo titaru panga i. Tiyei ne, “Kumata be idi nga takapye be lo tagaua ye di tooltool yo Maro be matan kala di nga, ngan kulkulunu ngan ole tasolo urata moonoo dook tiap matana matana muku ngan.” 23Motong la yaru itar di kuto maimai a be matadi kala di tooltool yo tigaua ye bareme ke Yesu nga, ngan ye malala tina yo atu atu nga. Motong la yaru tisapa ye kaningi inbe tipatarau ye di tooltool tina yo titara lodi medana pang Tool Mai nga. Ngan le ye dada yo yaru tiyeii nen i, in le titar di la Tool Mai tani in baene. 24Ngan tiyei nen a imot, motong la Paulu iye Banabas tina ngan tipa kataunu ke tana mai Pisidia, a tipa so le la yaru pombe ye tana mai san Pampilia. 25Tila pombe Pampilia, motong la yaru la tiwetewete betanga ke Maro pang di tooltool ke malala mai Pega a imot. Motong la yaru tipa mulu a tidu pang ye malala mai san yo Atalia in nga.

26Tila pombe Atalia, motong la yaru tiyiri ye ookoo atu, inbe tikooi a timulu pang malala mai Antiok ke tana mai Siria. Ngan ye malala mai tani in la muku ngan di tooltool yo titara lodi medana pang Yesu nga, ngan titar di la Maro baene a be nen ngan lono pang di a iyei dada dook mata pang di, inbe tiwanga di be tila la tiyei urata ben tina yo nookoot ngan la tiyeii a imot koot i. 27Ngan yaru tila pombe Antiok, motong la tikiu di tooltool yo tigaua ye bareme ke Yesu nga, ngan man tigaua, inbe tigasa pang di ye so tina le imot yo Maro iyei ye yaru baedi nga. Inbe tiwete pang di lapau ye yo Maro iso dada pang di tooltool yo tipa ye rara kidi tiap nga, ngan le titara lodi medana panga nga. 28Motong la sila tiye Yesu di galiunu tina ngan tiyepe kaiye nango la Antiok ngo.

Rau Ke Maro

© Wycliffe Bible Translators, Inc. All rights reserved

More Info | Version Index