Soekvorm

KEJADIN 32

Ersikap Jakup njumpai Esau

1Sanga Jakup ras rombongenna nerusken perdalanenna, reh piga-piga malekat njumpai ia. 2Kenca iidah Jakup malekat e, ersurak ia, nina, “ Kemah Dibata kap enda!” E maka ibahanna gelar ingan e Mahanaim.

3Isuruh Jakup suruh-suruhenna leben njumpai Esau si ringan i negeri Edom. 4Itenahkenna arah kalak enda gelah ikatakenna man Esau, bagenda, “Aku Jakup suruh-suruhenndu si patuh, ngataken man bandu, tuanku Esau, maka kidekah enda ras Laban aku tading, la aku mulih seh genduari. 5Lit lembungku, kaldengku, biri-biringku, kambingku, ras suruh-suruhenku. Kutenahken kata enda man bandu, Tuan, alu pengarapen, gelah mekuah atendu bangku.”

6Kenca suruh-suruhen e mulih man Jakup nina, “Enggo ijumpai kami seninandu Esau, janah genduari sangana ia i bas perdalanen njumpai kam. Lit 400 kalak dilaki ngikut ras ia.” 7Megi si e mbiar dingen gentar si Jakup. E maka ibagina anak buahna jadi dua bagin, bage pe biri-biri, kambing, lembu ras untana.

8Nina i bas ukurna, “Adi reh Esau merang terpuk si pemena, terpuk si peduaken banci kiam.”

9Kenca e ertoto Jakup, “O Dibata si isembah niningku Abraham, si isembah bapangku Isak, begiken min aku! Isuruhndu aku, o TUHAN, gelah aku mulih ku tanehku, ku keluargangku, janah ikatakenNdu maka Kam erbahanca kerina erdalan alu mehuli man bangku. 10La metunggung aku ngaloken ulina perbahanenNdu ras pertetap ateNdu si enggo icidahkenNdu man bangku, suruh-suruhenNdu. Sanga aku ngepari Lau Jordan sada ciken ngenca lit i bas aku, genduari enggo mulih aku alu si dua nterpuken enda. 11Ertoto aku, pulahi min aku i bas seninangku Esau nari. Mbiar aku reh ia merang aku ras ngelesapken kami kerina, subuk diberu bage pe danak-danak. 12Inget padanNdu man bangku maka kerina ibahanNdu erdalan alu mehuli, ras mereken man bangku kesusuren teremen asang si ngasup kalak meligaisa, bali teremna ras kersik i tepi lawit.”

13-15Kenca erberngi i jah, ipilih Jakup asuh-asuhenna jadi persembahen man seninana Esau: 200 kambing beruna, 20 kambing bajarna, 200 biri-biri beruna ras 20 biri-biri bajarna, 30 unta beru-beru ras anakna, 40 lembu ras 10 jenggina, 20 kelede beruna, ras 10 kelede sangkarna. 16Iterpukenna asuh-asuhen e jadi piga-piga terpuk, isuruhna sekalak suruh-suruhen njaga tep-tep terpuk. Nina man kalak enda, “Leben kena asa aku; ban kelang-kelangna tep-tep terpuk.” 17Nina man suruh-suruhenna si pemena, “Adi jumpa kam ras seninangku Esau, janah isungkunna kam, ‘Ise tuanndu? Ku ja perlawesndu? Ise empuna asuh-asuhen si igerandu e?’, 18arus maka ijabapndu, ‘Kerina asuh-asuhen e suruh-suruhenndu Jakup empuna. Iberekenna atena jadi pemere man tuanna Esau. Ia arah pudi denga.’ ” 19Perentah si seri iberekenna man suruh-suruhenna sipeduaken, sipeteluken, ras man kerina si njaga terpuk asuh-asuhen e. Nina, “Kenca jumpa ras Esau 20arus bage nindu, ‘Payo, suruh-suruhenndu Jakup i pudi kami denga.’ ” Nina Jakup i bas ukurna, “Kubuatlah ukurna alu mereken pemere enda, janah kenca jumpa kari aku, ialokenna aku.” 21E maka ipelebena kalak naruhken pemere e, sedang ia erberngi i bas kemahna i bas berngi e.

Jakup erbebe i Peniel

22I bas berngi e ka, medak Jakup. Ibabana duana ndeharana, ras duana gundikna, ras anakna si sepuluh sada, ngepar Lau Jabok. 23Kenca isuruhna kerina kalak enda ngepar, e maka barang-barangna ikeparkenna 24tapi ia tading si sada arah pudi.

Kenca bage reh sekalak dilaki erbebe ras ia seh nandangi pultak matawari. 25Kenca ieteh dilaki ndai maka la ia banci menang i bas perbeben e, e maka ipekpekna bena paha Jakup seh tersiher. 26Nina dilaki ndai, “Pulahi aku, enggo nandangi terang wari.” Tapi nina Jakup njabapsa, “La kam kupulahi adi la ipasu-pasundu aku lebe.”

27“Kai gelarndu?” nina dilaki e nungkun.

“Jakup,” nina njabapsa.

28Nina dilaki ndai, “Genduari lanai Jakup gelarndu. Enggo erbebe kam ras Dibata ras manusia, janah enggo kam menang. E maka Israel ibahan gelarndu.”

29Nina Jakup, “Genduari kataken ka gelarndu.”

Tapi nina njabapsa, “Man kadendu meteh gelarku?” Kenca bage ipasu-pasuna Jakup.

30Nina Jakup, “Enggo pedempak aku ras Dibata, tapi tetap denga aku nggeluh.” E maka Peniel ibahanna gelar ingan e. 31Matawari enggo pultak sanga Jakup nadingken Peniel. Mengkah-engkah ia erkiteken enggo tersiher bena pahana. 32Seh ngayak genduari kesusuren Israel la man jukut bena paha rubia-rubia sabap Jakup kena pek-pek i bas bagin e.

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index