Soekvorm

KEJADIN 35

Jakup ipasu-pasu Dibata i Betel

1Nina Dibata man Jakup, “Lawes lah kam minter ku Betel. I jah me kam ringan. Pajekken i jah sada batar-batar ingan ersembah man bangKu. Aku kap Dibata si petandaken baNa man bandu i Betel sanga kam lompat nadingken seninandu Esau.”

2Erkiteken si e ngerana Jakup man keluargana ras man kerina kalak si ras ia, “Ambekkenlah kerina dibata-dibata si deban si lit i bas kam; urasi bandu maka kam bersih kerina, jenari pakelah uisndu si bersih. 3Sitadingken me ingan enda, lawes kita ku Betel, i jah kupajekken ateku sada batar-batar ingan persembahen man Dibata si enggo mulahi aku sanga i bas kiniseran, si enggo ngarak-ngarak aku kujapa pe aku lawes.” 4E maka ibereken kalak enda kerina dibata-dibata si lit i bas ia man Jakup, ras anting-anting si ipakena pe. Itanemken Jakup kerina barang-barang i teruh batang kayu si galang deher Sikem.

5Sanga Jakup ras anak-anakna berkat nadingken ingan e, mbiar kerina penduduk kuta-kuta si lit i sekelewetna, e maka la iayakina rombongen Jakup. 6Dungna seh me Jakup ras kerina kalak si ras ia i Betel si nai igelari Lus i negeri Kanaan. 7Ipajekken Jakup i je sada batar-batar ingan ersembah man Dibata. Ibanna gelar ingan e “Dibata nu Betel”, erkiteken Dibata enggo encidahken baNa man Jakup i je, sanga ia lompat nadingken kakana. 8Suruh-suruhen Ribka, e me kap Debora, mate i je, janah ikuburken i teruh batang kayu si mbelin arah Selatan Betel. Em sabapna maka ibahan gelar kayu e “Kayu perngandungen”.

9Kenca Jakup mulih i Mesopotami nari, Dibata encidahken baNa ka man Jakup ras masu-masu ia. 10Nina Dibata man bana, “Gelarndu si Jakup, tapi mulai genduari nari kam igelari Israel.” Bagenda me maka Dibata nggelari ia Israel. 11Jenari nina Dibata man bana, “Aku kap Dibata Si Erkuasa. Nteremlah kesusurenndu. Bangsa-bangsa ernini man bandu, kam jadi nini raja-raja. 12Kubereken man bandu ras man kesusurenndu taneh si nai Kubereken man Abraham ras man Isak.” 13Kenca e lawes Dibata i bas si Jakup nari.

14I bas ingan Dibata ngerana man bana e, ipajekken Jakup sada batu peringet-ingeten. Iamburkenna lau anggur ras minak saitun i babona, janah alu bage batu e enggo jadi sada batu si badia ingan ersembah man Dibata. 15Ingan e ibahan Jakup gelarna “Betel”.

Rahel mate

16Jakup ras keluargana nadingken Betel. Sanga kalak e lanai ndauhsa i Eprata nari, enggo seh paksana Rahel mupus, tapi lanai lang-lang serana akapna mupus e. 17Tupung paksana mesui kal akapna nina bidan man bana, “Ola mbiar Rahel, dilaki kang anakndu si tubuh e.” 18Tapi Rahel nandangi mate me, janah ope denga peltep kesahna ibahanna gelar anakna e Benoni, tapi igelari bapana ia Benyamin.

19Kenca Rahel mate, ikuburken ia i tepi dalan ku Eprata; genduari Betlehem gelarna ingan e. 20Ipajekken Jakup sada batu peringet-ingeten i je, janah seh asa genduari pe batu e tetap denga jadi tanda kuburen Rahel. 21Kenca bage iterusken Jakup perdalanenna, e maka ibahanna barung-barungna i kepar menara Eder.

Anak Jakup si dilaki

(1Kro. 2:1-2)

22Sanga Jakup ringan denga i bas taneh e, ersada kula me Ruben ras Bilha, e me gundik bapana. Ieteh Jakup si enda e maka seh kal atena nembehna.

Lit sepuluh dua kalak anak Jakup dilaki. 23Anak Lea e me Ruben (ia me anak Jakup sintua), Simeon, Lewi, Juda, Isakar, ras Sebulon. 24Anak Rahel e me: Jusup ras Benyamin. 25Anak Bilha budak Rahel e me: Dan ras Naptali. 26Anak Silpa budak Lea e me: Gat ras Aser. Enda kerina tubuh i Mesopotami.

Isak mate

27Jenari idahi Jakup bapana Isak i Mamre, deher Hebron, e me sada ingan i ja Isak pernah tading ras Abraham i je. 28-29Kenca Isak enggo seh tuana, e me kap ibas umur seratus waluh puluh tahun, mate ia. Duana anakna, e me kap Esau ras Jakup, ras-ras engkuburken ia.

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index