Soekvorm

Ebavevuvu 1

Ibuibubuna Vaguvagu Ifuifufuna

1Nago-moena ibuibubuna moyaina adiebavevuvu, Yaubada gabama ke babi gikiveyegemonidi ke gibubudi. 2Ada babi matatabuna gibubu-yabuna aku keke wa anakidewadewa, au yamayamana. Aku gufa babi matatabuna gileledamana ada yuyuvana bakibaki gufa getana matatabuna gikiwafina. Ada kaduwe Yaubada Aluwaluwana giluluilotagona.

3Ada Yaubada givona, “Malina gina yegemona.” Ada malina giyegemona. 4Ada malina-nai giitana ani iwakana, ada malina ke yuyuvana giluididi. 5Yaubada malina givewagana ‘yadayada’ ke yuyuvana givewagana ‘bogi’. Lavilavi gielai ada ginau malabutuya, tainei bademowa yadayada nagona.

6Ada yadayada anavelu wagaine Yaubada givona, “Mwatugu gina yegemona gufa nefanine ke gufa gina luidina ada gufa tufona mwatugu getane ke gufa tufona dibune.” Ada giyegemona anafaiweya givona mamauwe. 7Taidei anafaiweya mwatugu gibubuna gufa nefanine ke gufa giluidina, tufona getane ke tufona dibune, 8ada Yaubada mwatugu givewagana ‘gabama’. Lavilavi gielai ada ginau malabutuya, tainei bademowa yadayada anavelu.

9Ada givona, “Gufa gabama dibune ina liyagogona inanau fafali seyana wagaine e aku babi ayayana gina yegemona.” Ada giyegemona anafaiweya givona mamauwe. 10Ada Yaubada babi ayayana givewagana ‘babi’, aku gufa giliyagogona ginau fafali-nai seyana wagaine ani givewagana ‘leyaga’. Ada Yaubada giitana taidei ani iwakana.

11Ada kaduwe Yaubada givona, “Gudana ke ai wawaifeidi inatabo babi wagaine, inaveguwa, aku waifeidi guwadi negenine, ke waifei-dina ina tabolalaga anaita au anafaiweya.” Ada giyegemona anafaiweya givona mamauwe. 12Gudana wawaifeidi itabotabo adiita anafaiweya, ada ai guwaguwa wawaifeidi itabotabo adiita anafaiweya. Yaubada giitana matatabuna ani iwakana. 13Lavilavi gielai ada ginau malabutuya, tainei bademowa yadayada anaveto.

14Yadayada anavelaufuli wagaine kaduwe givona, “Malina ina yegemona gabameya ke malina-dina ina luididi yadayada ke bogi. Taidei malina-dina badi iyaiyaya ina vewala bakula anatova, bavagu anatova, yadayada, ke malamala seyana seyana wagaidiya. 15Badi malina-dina ina miyamiya gabameya ke babi ina tuimalina.” Ada giyegemona anafaiweya givona mamauwe. 16Yaubada malina luwei lakaidi gibubudi, malina lakaina banae yadayada gina tuimalina ke malina maita kabisona banae bogi gina tuimalina. Kaduwe ailabama gibubudi. 17Malina-dina gisedi gabameya ke babi ina tuimalina. 18Malina lakaina babi gina veimeya yadayada wagaine, ke malina maita kabisona gina tuimalina bogi wagaine, ada malina ke yuyuvana ina luididi. Ada giitana ani iwakana. 19Lavilavi gielai ada ginau malabutuya, tainei bademowa yadayada anavelaufuli.

20Ada yadayada anavenimafafalina wagaine, Yaubada givona, “Kevakeva wayawaidi gufa ina vemagana, ke manuga inayavega mwatuguya babi getane.” 21Ada leyaga anakevakeva lakaidi gibubudi ada kevakeva moyaidi wayawaidiyavo yaviyavivilidiyavo gufa ivemagana. Ada gaitoma seyana seyana anaita au anafaiweya, ke manuga seyana seyana adiita au anafaiweya. Ada giitana taidei ani iwakana. 22Ada Yaubada givonanuwakabubuyedi, givona, “Natumiyavo wana vetubulalagidi ada yoo gina veinala, leyaga wana vemagana.” Kaduwe anafaiweya givona manuga wagaidiya, “Natumiyavo wana vetubulalagidi babi matatabuna wagaine.” 23Lavilavi gielai ada ginau malabutuya, tainei bademowa yadayada anavenimafafalina.

24Yadayada anavesikisi wagaine Yaubada givona, “Kevakeva tulina tulina wayawaidi ina yegemona ke babi ina vemagana. Ada ina tubulalaga seyana seyana adiita au anafaiweya, kevakeva melamelala, kevakeva geyageyalilidi, ada kevakeva walawala.” Ada giyegemona anafaiweya givona mamauwe. 25Kevakeva waagedi ada yagayaganidiyavo adiita au anafaiweya gibubudi. Ada giitana taidei ani iwakana.

26Ada Yaubada givona, “Kaliva kana bubuna adaita anafaiweya ke badi ina veimeya kevakeva leyageya imiyamiya, kevakeva waofadi, ada kevakeva waagedi, ke yagayaganidiyavo wagaidiya. Ada kaduwe babi matatabuna wagaine ina veimeya.”

27Taidei anafaiweya kaliva gibubudi Tauna anaita ke yana veuluva anafaiweya, anaita ke yana veuluva anafaiweya Yaubada gibubudi kaliva ke vavine. 28Yaubada givonanuwakabubuyedi, givona, “Natumiyavo wana vetubulalagidi ada yoo ginaveinala. Babi wana vemagana ada wana veimeyena. Kevakeva leyageya, kevakeva waofadi, ke kevakeva wayawaidi yaviyavivilidiyavo babi wagaine wana veimeyedi.”

29Ada Yaubada givona, “Wanaitana. Gudana wawaifeidi matatabuna ada ai guwaguwa gavelemi faina wagaidiya amiga wana nuwagana. 30Ada kevakeva babi wagaine, manuga mwatuguya ke kevakeva iyagayagana, gavana wayawaidi, ani gudana matamatagidi gaveledi ke wagaidiya adiga ina nuwagana.” Ada giyegemona anafaiweya givona mamauwe.

31Yaubada giitana yana ibubuna matatabuna iwakana velemoena. Lavilavi gielai ada ginau malabutuya, tainei bademowa yadayada anavesikisi.

Ebavevuvu, Mosese yana buki nagona

© Wycliffe Bible Translators, Inc. All rights reserved.

More Info | Version Index