Soekvorm

Genesis 42

Joseph-aam Anelgutai Egypt-aartut Mukaarkanek Kipucarturluteng

1Jacob-aam nallunriamiu neqkartangqerrucia Egypt-aami, qetunrani qanrutai, “Ciin ellmikun uitaluci tangertaaguceci? 2Niitua neqkartangqerrniluku Egypt-aami; ayagluci tuavet kipucarturci neqkamten̄ek palunritniartukut.” 3Tua-i qulnguluteng Joseph-aam anelgutai ayagtut Egypt-aamun kipucarturluteng neqkanek. 4Tau͡gaam Jacob-aam maligucetenritaa Benjamin-aaq Joseph-aam kinguqlia anngainun, aaryugluni picurlagnayukluku.

5Jacob-aam qetunrai kipussaagtut allanun ilaulluteng kipussaalrianun, piitnaan-llu cali Canaan-aami. 6Joseph-aaq nunam angayuqaqaa; ellii-llu tun'isten͞guluni yugnun tamalkuitnun. Tua-i Joseph-aam anelgutai taingameng ciktut ciuqerranun nuna kegginameggnek agturluku. 7Joseph-aam anelgutni tangrramiki elitaqai, tau͡gaam nallunguarai qancurlagalluki-llu. Qanrutai, “Naken piceci?”

Taukut kiugaat, “Canaan-aamek piukut neqkanek kipussaagluta.”

8Joseph-aam anelgutni elitaqai, ellaita tau͡gken elitaqevkenaku. 9Joseph-aam-llu neq'erai qavanguq'lallni ellaitnek; qanrutai-llu, “Nunamek paqtellriaruuci, nuna man'a paqtarci nallunrirnaluci nau͡gg'un cirlakumallerkaanek.”

10Ellaita qanrutaat, “Qang'a, neqkanek kiputnaluta tau͡gaam taillruukut. 11Ataucim angutem qetunraqaakut, piciuluta yuulriaruukut nunamek paqtellriaruvkenata.”

12Joseph-aam qanrutai, “Qang'a, nunam mat'um nau͡gg'un cirlakumallerkaanek paqtellriaruuci.”

13Taukut qanertut, “Wangkuta qula malrugnek cipluku anelgutkelriaruukut ataucimek ataluta, Canaan-aami; kinguqlikacaarput watua atamini uitauq, aipaa tau͡gaam piunrillruuq.”

14Joseph-aam tau͡gaam qanrutai, “Qanellrucimtun nunamek paqtellriaruuci. 15Waten iqluunrilucirci naspaaciqaqa: waniwa ukvernarcariunga atanrem atrakun; maaken ayagngaituci kinguqlikacaarci tainatkaanun. 16Ilasi utertelluku aqvavkarciu, unegtellriani itengqaniartuci nallunairumanatkaanun iqluunrilucirci, wall'u ilumun nunamek paqtellriaruuci.” 17Tamalkuita-llu itengqavkarai pingayuni ernerni.

18Erenret pingayuatni Joseph-aam qanrutai, “Waten pikici unguvayukuvci, wiinga qigcikngamku Agayun: 19Piciulriaruluci yuukuvci ilasi unegceciu itengqavkarluku, elpeci ut'rutniartuci ilavci neqkaitnek. 20Kinguqlikacaarci taitarkaugarci wangnun, qanllerci asguranairluku, tuqunritniartuci.”

Tuaten tua-i piyugtut 21ellmeggnun qanruyulluteng, “Ilumun wangkuta pinarqelriaruamta kinguqlimten̄un, nanikualuni kaigavikengraakut niitellrunrilamteggu, tua-i maa-i pinerrlugcecimalriakut.”

22Reuben-aam kiugai, “Nauwa qanrutellruyaaqamci assiinaku tan'gaurluq pisqevkenaku. Tau͡gaam niitellrunritarpecia. Tua-i waniwa tuqucillemta akia aturarput.” 23Nalluat Joseph-aamun qanllerteng taringuraucianek, qanercirluni qalarutellruateng. 24Joseph-aam uniarrluki aluviliurtuq. Ataam qalarcugngariami ullagai, Simeon-aaq-llu tangvagtelluku ellaitnun qillerqaa.

Joseph-aam Anelgutai Utertut Canaan-aamun

25Joseph-aaq-llu alerquiguq imiisqelluki issratait mukaarkanek, akiliutellrit-llu ataam ekesqelluki issrataitnun, taquitesqelluki-llu. Tua-i tuaten piit. 26Taukut ucilirait ciulvateng neqkanek kiputellermeggnek ayagluteng-llu. 27Iliita-llu callartellerminiu issratni ciulvani nerevkarnaluku arulairumallermeggni akiliutekellni nalaqai issratem paingani. 28Anelgutni-llu qanrutai, “Akiliutekelqa utercetliniat. Tang waniwa issratma paingani!” Niicamegteggu ircaqruallagtut, uuleggluteng-llu tangertaagutut qanerluteng, “Ciin wangkuta Agayutem waten piakut?”

29Tekicameng Jacob-aamun atameggnun Canaan-aami qanemcikaat tamana tuaten pimallerteng: 30“Angutem nunam angayuqran qancurlagataakut, nunamek-llu paqtellriaruniluta. 31Wangkuta qanrutarput, ‘Wangkuta piciulriaruluta yuugukut, nunamek paqtellriaruvkenata. 32Qula malrugnek cipluku anelgutkelriaruukut atamta qetunraqluta. Atauciq tau͡gaam piunrillruluni, kinguqlikacaaq-llu maa-i uitauq atamini Canaan-aami.’ 33Taum nunam angayuqran qanrutaakut, ‘Uuggun nallunrirciqaqa piciulriarucirci: Ilasi unilluku maavet neqkanek ayauci kainiqellrianun ilavcen̄un. 34Kinguqlikacaarci wangnun taitniarci. Nutaan nallunrirniarqa piciucirci nunamek-llu mat'umek paqtellriarunrilucirci; anelgutsi-llu ataam tunluku elpecen̄un, maani-llu elpeci kipussaalarniartuci.’”

35Imairamegteki issrateteng, maaten piut tamarmeng akiliutekellrit issrataitni uitaluteng. Ellaita atameng-llu tangrramegteki akikalgiralteng kapegcugniurtut. 36Jacob-aam qanrutai, “Angniilutkiurarpecia irniamkun: Joseph-aaq piunrirluni Simeon-aaq-llu, waniwa-llu cali ayaucugluku Benjamin-aaq. Wangnun tau͡gaam makut nangteqnarqelriit tut'ut.”

37Reuben-aam atani qanrutaa, “Ut'rutenrilkumku Benjamin-aaq tuqutniagken wiinga malruk irniagka. Wangnun aulukevkaquvgu ut'ruciiqaqa.”

38Tau͡gaam Jacob-aam kiugaa, “Qetunrama maliggngaitaaci, anngaa nauwa ak'a tuqullrulria, ellii kiimellirluni. Ayainanerpecen̄i picurlakan ak'allaurcama angniitem ugaani tuquvkarciqerpecia.”

Yupik Bible

Yupik Bible © 2012 American Bible Society

More Info | Version Index